Aningaasaateqarfik - Den Grønlandske Fond
Den Grønlandske Fond 10. december 2015-imi pilersinneqarpoq Kalaallit Nunaanni aningaasaateqarfiit marluk Kulturfonden Danmark-Grønland aamma Det Kongelige Grønlandsfondip kattunneqarnerisa kingunerisaanik.
Kulturfonden Danmark-Grønland ulloq 5. september 2005-imi pilersinneqarpoq Grønlandsfonden af 1959, Folketingets Grønlandsfond aamma Kulturfonden Danmark-Grønlandip kattunneqarnerisigut, aamma Det Kongelige Grønlandsfond ulloq 28. september 1974 pilersinneqarpoq Kong Frederik den Niendes aamma Dronning Ingrids Fondip Kalaallit Nunaanni tuberkuloseqarnerup akiorniarneqarneranut aningaasaateqarfiup aamma Kong Christian den Tiendes aamma Dronning Alexandrines Grønlands-fondip kattunneqarnerisigut.
Aningaasaateqarfiup aningaasaatai pissarsiarineqarput aningaasaateqarfiit taakku marluk aningaasaataasa kattunneqarnerisigut kattunneqarnerup nalerpiaani 24.500.000 kr missaannik aningaasartaqartut.
Aningaasaateqarfik suliaqarpoq ileqqoreqqusaq tunngavigalugu tamatumalu kingorna aningaasaateqarfik imatut siunertaqalerpoq:
1)
Kalaallit ikiuiniarnikkut, ilisimatusarnikkut kulturikkullu Kalaallit Nunaanni Kalaallit Nunaatalu avataani siunertaat tapiissuteqarfigisassallugit.
2)
Kalaallit Nunaata aamma danskit naalagaaffiata ilaasa akornanni kulturikkut attaveqarnerit siuarsarneqarnissaannut tapiissuteqartarnissaq, ilaatigut makku ilanngullugit:
a. Kalaallit Nunaata Danmarkillu akornanni kulturikkut peqatigiittarneq siuarsassallugu, ilaatigut Kalaallit Nunaannut aamma Kalaallit Nunaannit angalasarnernut tapiissuteqartarnissaq.
b. Kalaallit Nunaanni Danmarkimilu kulturikkut isumaginninnikkullu suliffeqarfiit tapiissuteqarfigisassallugit.
c. Atuagassiat, atuakkat filmiliassallu il.il. saqqummiunneqarnissaannut tapiissuteqartarnissaq.
d. Kalaallit ukiuni arlalinni Danmarkimiissimasut Kalaallit Nunaanniinnissaminnut immikkut pisariaqartitsisut aamma siusinnerisukkut Danmarkimi innuttaasimasut ukiut arlallit Kalaallit Nunaanniissimanerminni Danmarkimiinnissaminnut immikkut pisariaqartitsisut tikeraarlutik angalanerminni akiliunneqarnissaannut tapiissuteqartarnissaq.
e. Kalaallinut Danmarkimi ilinniagaqartunut tapiissuteqartarnissaq.
3)
a. Umiarsuup Kalaallit Nunaaliartaatip “Hans Hedtoft”-ip umiunerani ajunaarsimasut kinguaavisa aningaasatigut ikiorserneqartarnissaannut ikorfartorneqartarnissaannullu tapiissuteqartarnissaq, Grønlandsfonden af 1959-imit atorunnaarsinneqartumit tapiissutisisartut naatsorsuuteqarsinnaatitaaneri tassuunakkut isumagineqarsinnaaqqullugit.
b. Grønlandsfonden af 1959-imit atorunnaarsinneqartumit tapiissutisisartut naatsorsuuteqarsinnaatitaaneri isumagisassallugit Kalaallit Nunaanni pinngortitap pissusianik pissuteqartumik ajunaarnerit kingunerisaasa pakkersimaarniarneqarnissaat siunertaralugu siusinnerusukkut tapiiffigineqartarsimasut naatsorsuuteqarsinnaatitaaneri isumagissallugit, Grønlandsfonden af 1959-ip aningaasaataasa tunngaviusut ilaasa iluanni naleqquttumik suli tapiissuteqartarnissaq Kalaallit Nunaanni pinngortitap siunissami nassatarisassaannik ajunaartarnissat kingunerisinnaasaasa pakkersimaarneqarnissaat siunertaralugu.
Aningaasaateqarfiup nr. 3)-mut tapiissutai tapersersortariaqartunut aamma/imaluunniit pilersitsiniartunut, ilinniagaqarniartunut assigisaannullu ikiuutitut tapiissutigineqartassaput. Aningaasaateqarfiup aningaasaatai inatsisit naapertorlugit pisortat tapiissutigisartagaannut taarsiutitut tapiissutigineqarsinnaanngillat, kisiannili pisortat aningaasaliissutigisaannut tapertatut tapiissutigineqarsinnaallutik.
Aningaasaateqarfik aqunneqassaaq siulersuisunit sisamanik ilaasortalinnit, tassalu ukuusunit Naalagaaffiup Kalaallit Nunaanni Sinniisua siulittaasutut, ilaasortaq ataaseq Naalakkersuisunit toqqarneqartoq aamma ilaasortat marluk Inatsisartunit toqqarneqartut. Aningaasaateqarfiup ullumikkut siulersuisui ukuupput:
- Naalagaaffiup sinniisua Julie Præst Wilche (Siulittaasoq)
- Naalakkersuisoqarfimmi pisortaq Hans-Peder Barlach Christensen (Naalakkersuisut/Naalakkersuisut Siulittaasuata Naalakkersuisoqarfia)
- Jane Petersen Lantz (Inatsisartut)
- Miki Jensen (Inatsisartut)
Siulersuisut ukiumut marloriarlutik tapiissutinik agguaassisarput. Qinnuteqaatinik kingusinnerpaamik nassiussivissat tassaapput 1. april aammalu 1. oktober. Siulersuisut ataatsimiittarput apriilip oktoberillu naanerani. Siulersuisut ukiumut ataatsimiinnerisa avataatigut tapiissutinik tunniussisoqarneq ajorpoq.
Kalaallit Nunaata Danmarkillu akornanni tikeraarnissamut (inuit pitsaanerusumik periarfissinnissaat pillugu) qinnuteqaatissiaq uannga aaneqarsinnaavoq uani.
Siunertanut allanut qinnuteqaatissiaq (peqatigiiffiit pilersaarutaannut, atuakkiorniarnermut, tusagassiornermut, eqqumiitsuliornermut, ilinniarniarnermut allanullu) uannga aaneqarsinnaavoq uani.
Qinnuteqaatit uunga nassiunneqartassapput Kalaallit Nunaanni Naalagaaffiup Sinniisoqarfianut, Indaleeqqap Aqq. 3, Postboks 1030, 3900 Nuuk, Qinnuteqaatip imarissavaa siunertaq pillugu nassuiaat sukumiisoq, qinnuteqaatigineqartoq pillugu aningaasatigut missingersuut kakkiullugu nassiunneqassaaq taamatuttaaq aamma siusinnerusukkut suliniutigisimasat taamaaqataat pillugit naatsorsuusiatigut paasissutissiissutaasinnasut ilanngullugit nassiunneqassallutik. Ingerlatsinermi aningaasartuutinut tapiisoqartanngilaq, soorluttaaq ataatsimut isigalugu aningaasarsiassanut taapiissuteqartoqartarani. Qinnuteqaatit erseqqissaatitaqanngitsut itigartitsissutigineqartassapput. Aammattaaq paasissutissiissutigineqartariaqarpoq siunertaq pillugu allaniit tapiiffigineqarnissamik qinnuteqaateqartoqarsimanersoq.
Ataatsimut isigalugu aaqqissuussimasanut il.il. siulersuisut qinnuteqaatinik oqaluuserinninnerisa nalaani pereersimasunut tapiissuteqartoqarsinnaanngilaq.
Allamik isumaqatigiissuteqartoqarsimatinnagu ukiup ataatsip qaangiutereerneratigut aningaasaliissuteqarnissamik neriorsuisimaneq atorunnaarsinneqartarpoq. Tamanna Naalagaaffiup Sinniisoqarfianut saaffiginnissutigineqartassaaq.
Tapiiffigineqarnissamut piumasaqaatit uani sukumiinerusumik atuakkit.
Den Grønlandske Fond pillugu paasissutissat allat pissarsiarineqarsinnaapput uunga saaffiginninnikkut: aningaasaateqarfimmik aqutsisoqarfik oqarasuut +299 32 10 01 imaluunniit mailikkut uunga ro@gl.stm.dk.
Den Grønlandske Fondimi aalajangersakkat takuneqarsinnaapput uani.