Naalagaaffiup Sinniisoqarfiata oqaluttuassartaa

Naalagaaffiup sinniisua naalagaaffimmi oqartussanut Kalaallit Nunaanni qullersaalluni sinniisuuvoq. Naalagaaffiup Sinniisoqarfia Ministeriuneqarfiup ataani aaqqissuussaanikkut inissisimavoq.

1950 tikillugu Kalaallit Nunaanni qitiusumik allaffissorneq Avannaani Kujataanilu langsfogedinut marlunnut aamma landsrådinut marlunnut avinneqarsimavoq. Naalakkersuinikkut Allaffissornikkullu pissutsinut Kalaallit Nunaannut Ataatsimiititaliarsuup isumaliutissiissutaata kingorna nutaamik aaqqissuussisoqarpoq kalaallit taamaallaat ataatsimik ataatsimoorussamik landsrådeqalerlutik ataatsimillu landshøvdingeqarlerlutik.

Kalaallit ataatsimut landsrådeqqaavata ataatsimiinnera siulleq pivoq septembarip 26-ianni 1951 Nuummi landshøvding P. H. Lundsteen siulittaasoralugu.

Tamatuma kingorna Kalaallit Nunaanni qitiusumik allaffissorneq landshøvdingeqarfiup isumagisarilerpaa. Landshøvdingip suliassai tamarmiusut pillugit inatsisini allaniluunniit allassimasoqanngilaq. Nunap immikkoortuani qullersaanerup landsrådimullu siulittaasuunerup saniatigut suliassaqarfinni arlalinni landshøvdingi atuuffeqarpoq, assersuutigalugit landsrådip kommunalbestyrelsillu ingerlatsiviinut tunngasuni, ineqarnermut inuussutissarsiutinullu tapiisarnermi, sulisoqarnermut akissarsiaqarnermullu tunngasunut aamma suliffeqarfiit assigiinngitsut (napparsimmaviit, atuarfiit, radiofoni il.il.) allaffissuutiginerat.

Namminersornerullutik Oqartussat 1. maj 1979-imi atuutilersinneranni, tak. namminersornerulluni oqartussaaneq pillugu inatsit tunngavigalugu Kalaallit Nunaanni landshøvdingip maannamut suliarisimasai allannguutitalerlugit Naalagaaffiup Sinniisua atuutilersinneqarpoq, tak. namminersornerulluni oqartussaaneq pillugu inatsimmi § 20, imm. 2. Kalaallit Nunaanni Namminersorlutik Oqartussat 21. juni 2009-mi atuutilerneranni Naalagaaffiup Sinniisuata atuuffii allannguuteqanngillat.