Naalakkersuisut Siulittaasuata Jens-Frederik Nielsenip aamma Ministeriuneq Mette Frederiksenip pisortatigoortumik spiralilersuisimaneq pillugu utoqqatserneq Nuummi Katuami aaqqissuussami pingasunngorneq 24. september 2025 nal. 14:00 malunnartinniarpaat.
Aaqqissuussamut pilersaarut, arnanit spiralilersuinermi pineqartunit sinniisuutitaq suleqatigalugu pilersaarusiorneqartoq uani takuneqarsinnaavoq.
Ministeriuneq Mette Frederiksen oqaaseqarpoq:
”Danmark sinnerlugu spiralilersuisimaneq pillugu arnanut pineqartunut utoqqatsernikuuvunga aammalu kalaallit aaqqissuussaasumik Kunngeqarfimmi innuttaasunit allanit allaanerusumik aamma ajornerusumik pineqarneranut Danmarkip akisussaaffigisaanut kukkussuteqarnernut.
Naalakkersuisut siulittaasuat peqatigalugu pisortatigoortumik utoqqatsernerup Nuummi malunnartinneqarnissaanut periarfissinneqarnermut qilanaarpunga. Pisimasut allanngortissinnaanngilagut, kisianni akisussaaffimmik tigusisinnaavugut, aamma qanga pisimasunut saammaasseqatigiinnissamut pisariaqartitanik pilersitsisinnaavugut.
Nuummut tikeraarninnut atatillugu Naalakkersuisut siulittaasuat oqaloqatigaara, danskit naalakkersuisui saammaasseqatigiinnissamut aningaasaateqarfimmik, kalaallinut arnanut spiralilersorneqarsimasunut ataasiakkaanut aammalu kalaallinut allanut kukkusumik pineqarsimasunut aamma kalaaliunertik pillugu aaqqissuussaanikkut immikkoortinneqarlutik pineqarsimasunut aningaasanik taarsiissuteqarsinnaasumik pilersitserusunnerat pillugu.”
Sukumiinerusumik paasissutissat: Statsministerietip tusagassiorfinnut oqarasuaataa +45 29 10 88 25.
