Kalaallit Nunaanni Naalagaaffiup Sinniisoqarfia Oqaluttaanermik pissarsiorpoq

Kalaallit Nunaanni Naalagaaffiup Sinniisoqarfiani oqaluttaanertut atorfik 1. juli 2024-minngaanniit imaluunniit isumaqatigiissuteqarnikkut inuttalerneqassaaq.

 

Ujartorparput

Oqaluttaanertut danskit oqartussaqarfiininngaanniit nutsigassat naammassillugit suliarineqartarnissaat akisussaaffigissavat. Nutserisut avataaneersut sinniisoqarfiup suleqatigisai qanimut suleqatigissavatit aammalu suliat pitsaasumik naammassineqartarnissaat isumagissallugu, taamatuttaaq nammineerlutit annertunngitsunik nutserisassallutit. Aammattaaq sinniisoqarfiup suliaqarfiisa allat iluini suliassat allat ingerlattarnissaannut periarfissaqassallutit.

Atorfik namminersorfiusoq assigiinngiiaartunillu suliaqarfiusoq neqeroorutigaarput, ilaatigut danskit aamma kalaallit oqartussaqarfiinut attaveqartarnermik imaqartoq aammalu inuttut suliatigullu ineriartornissamut periarfissaqarluartoq.

 

Sinniisoqarfiup suliassai

Kalaallit Nunaanni Naalagaaffiup Sinniisoqarfia Statsministeriap ataani suliffeqarfiuvoq aammalu Namminersorlutik Oqartussat naalagaaffiullu oqartussaqarfiisa akornanni attaveqaataalluni. Naalagaaffiup Sinniisua tassaavoq naalagaaffiup oqartussaqarfiisa Kalaallit Nunaanni sinniisaasa qullersaat. Naalagaaffiup Sinniisoqarfiata aammattaaq suliat iluqatariit inatsiseqartitaanerannut tunngasut kiisalu nammineq aaningaasartuutiginagu eqqartuussisulersuussisinnaanerit isumagisarivai. Annertunerusumik paasisaqarumagaanni Naalagaaffiup Sinniisoqarfiata nittartagaa takuneqarsinnaavoq – www.rigsombudsmanden.gl.

Piginnaasat
Piumasaqaataavoq oqalutsitut ilinniarnerup naammassisimanissaa imaluunniit assigisaanik piginnaasaqarnissaq. Allatanik pisariusunik nutserinermik misilittagaqarnissaq, tamatumani inatsisinik nutserinermik misilittagaqarneqiluaqutaassalluni.

Naatsorsuutigaarput Office-pakkemik atuineq sungiusimagit. Aammattaaq iluaqutaassaaq namminersorlutit aammalu pissusissanik malinnilluarnikkut ESDH-systemimik atuinermik misilittagaqarnissat. Atorfininnerup aallartinnerani sinniisoqarfiup ESDH-systemianik atuinermut ilinniartitsineq ingerlanneqarumaarpoq.

Suliffeqarfiugatta 15-nik sulisoqartoq, pingaaruteqarpoq sinniisoqarfiup ingerlanneqarnerani aammalu sinniisoqarfiup atuuffiinut tunngatillugu suliassanik allanik tigusisinnaanissamut tunuarsimaannginnissat.

 

Atorfinitsitsinermut attuumassuteqartut

Aningaasarsiat atorfimmullu tunngassuteqartut aaliangerneqassapput Finansministeriap isumaqatiginiagassallu tunuliaqutaata isumaqatiginninniartussaasup akornanni isumaqatigiissutit atuuttut naapertorlugit malittarisassat naalagaaffiup ataani Kalaallit Nunaanni sulilersussanut atuuttut malillugit. Ataasiakkaanik isumaqatiginninniarnerni inissinnissamut piginnaasaqarnermullu sammisunut atatillugu ilassutissiisoqarsinnaavoq. Atorfinitsitsinerlu immikkut piffissaliineq naapertorlugu ilusilerneqarsinnaalluni.

Kalaallit Nunaanni Namminersorlutik Oqartussat inissiaataani inissamik innersuussisoqarsinnaavoq malittarisassat atuuttut malillugit akilerneqartartussamik. Atorfinikkiartornermut soraarnermullu atatillugu atorfinitsinneqartup ilaqutaasalu angalanissaannut akiliussisoqassaaq pigisallu nassiunneri aamma isumaqatigiissuteqarnermi tunngavigineqartuni aaliangersakkat naapertorlugit akiliunneqassallutik. Atorfinitsinneqarnissannili isumannaatsuunissamik piumasaqaatit misissuiffigineqaqqaassapput.


Paasissutissat sukumiinerusut

Atorfimmut tunngatillugu paasiniaasoqarsinnaavoq Naalagaaffiup Siinniisua Julie Præst Wilche attavigalugu oqarasuaatikkut (+ 299) 32 10 01.

Suliffigisimasat allattornerat ilanngullugu soraarummeersimanermut uppernarsaat ilanngullugu qinnuteqaat nassiunneqassaaq Naalagaaffiup Sinniisoqarfianit tiguneqartussanngorlugu kingusinnerpaamik ulloq 19. juni 2024. Qinnuteqaallu e-postitut uunga nassiunneqassaaq ro@gl.stm.dk. Qinnuteqaalli aamma allakkatigut nassiunneqarsinnaavoq uunga: Rigsombudsmanden i Grønland, Postboks 1030, 3900 Nuuk.