Aapparisamut akilersuutit

Katissimasutut aappariinnermi akilersuutit

Aappariit katissimasut imminnut pilersoqatigiittussaapput. Najugaqatigiikkunnaaraanni imaluunniit arlaata aappami pilersornissaa isumaginngippagu Naalagaaffiup Sinniisoqarfia qinnuteqarfigisinnaavoq aapparisap pilersueqataanissamut peqquneqarnissaa pillugu.

Aappariittut katissimanerup nalaani aapparisamit pilersorneqarnissaq qinnutigineqarsinnaavoq; najugaqatigiikkaanni imaluunniit isumaqatigiinnginneq pissutigalugu najugaqatigiikkunnaarsimagaluaraanniluunniit.

Arnat angutillu katissimasutut aapparisamit pilersorneqarnissamut qinnuteqarsinnaapput.

Averusernermi avinnermilu akilersuutit

Averusernermi avinnermilu akilersuisussaatitaaneq atorunnaartarpoq. Naalagaaffiup Sinniisoqarfiani avikkaanni imaluunniit averuseruseraanni taava isumaqatigiittoqarsinnaavoq arlaata aappani/aappakuni pilersuinnassagaa. Tassa arlaata aappani aappakuniluunniit pilersuutinik akiliiffigisassagaa.

Akilersuinissamut isumaqatigiittoqarpat taava ilanngullugu isumaqatigiissutigineqarsimassaaq qanoq sivisutigisumik pilersuisoqassanersoq, soorlu ukiut qassit pilersuisoqarnissaa ullormit averuserfimmit imaluunniit aviffimmit.

Akilersuutit aningaasat qanoq amerlatiginissaat isumaqatigiissutaasariaqanngilaq. Tamatumunnga tunngatillugu Naalagaaffiup Sinniisoqarfia ikiuussinnaavoq. Aamma akilersuisussaanermut isumaqatigiittoqarsinnaavoq aningaasartaqanngitsumik, aatsaallu arlaannaaniit kingusinnerusukkut kissaatigineqalerpat aningaasartalerneqartumik.

Isumaqatigiissutigineqarpat aapparisamut akilersuutit aalajangersimasunik aningaasartaqassasut, taava ilanngullugu isumaqatigiissutaasariaqarpoq Naalagaaffiup Sinniisoqarfiata aningaasat amerlassusissaannut tunngatillugu allannguisinnaatitaassanersoq, aappaasup arlaata allannguinissaq kissaatigilissappagu.

Averuseqqanerup nalaani taamaallaat akilersuineq ingerlanneqassanersoq averusilernermi isumaqatigiissutigineqarsinnaavoq. Tamanna nammineq aalajangigassaavoq. Tamanna apeqqut avivinnermi aatsaat isumaqatiginninniutaassanersoq aamma aalajangerneqarsinnaavoq.

Akilersuinissamut tunngatillugu aappariit katissimasut isumaqatigiissinnaanngippata averusernissamut imaluunniit avinnissamut suliaq Nalagaaffiup Sinniisoqarfiani naammassineqarsinnaanngilaq. Taamaattoqartillugu najukkami eqqartuussivik aqqutigalugu suliassanngortitsisoqassaaq, tassani pilersuisussaatitaaneq ilaatinneqassammat averusernermi avivinnermiluunniit.

Akilersuutit annertussusissaat

Akilersuutit annertussusissaat aappariit katissimasut isumaqatigiissutiginngippassuk tamatumunnga apeqqummut tunngatillugu Naalagaaffiup Sinniisoqarfia ikiuussinnaavoq. Ankestyrelsip Familieretsafdelingiata aalajangersagai najoqqutaralugit aningaasat akilersuutissat annertussusilerneqartarput. Tassani apeqqutaasarput makkua:

- Aapparisap, akileraarutit ilanngaatigereertinnagit, isertitaasa annertussusiat

- Qitornarisanut pilersuisoqarnersoq. Qitornanut akilersuutit allallu pisussaaffiit qitornanut tunngassutillit tassaapput taamaallaat naatsorsuinermi najoqqutarineqartussat

Akilersuutinik aaqqiisarnermut najoqqutassat Familieretsafdeling-ip nittartagaani atuarneqarsinnaapput: www.familiestyrelsen.dk (OBS)

QINNUTEQARNEQ

Katissimanerup nalaani

Katissimanerup nalaani akilersuisoqarnissaa qinnutigineqarusuppat – soorlu, isumaqatigiinnginneq pissutigalugu najugaqatigiinngikkaanni – taava tamanna Naalagaaffiup Sinniisoqarfianut saaffiginnissutigineqassaaq. Qinnuteqarnissamut tunngatillugu immersugassaqanngilaq, kisianni sukumiisumik nassuiaatigineqartariaqarpoq sooq katissimanikkut aapparisaq akilersuuteqartariaqarnersoq.

Averusernerup avinnerulluunniit kingorna

Naalagaaffiup Sinniisoqarfia aqqutigalugu averusernermi imaluunniit avinnermi akilersuutissat ilanngullugit aalajangersaavigineqassapput.

Najukkami Eqqartuussivik aqqutigalugu averusernermi imaluunniit avinnermi akilersuutissat aamma ilanngullugit aalajangersaavigineqassapput.

ALLANNGUINEQ

Akilersuutit allanngornissaat qinnuteqaatigineqassappat, taava akilersuutinut tunngatillugu aalajangiinermik suliarinniffiusoq attavigineqassaaq - Naalagaaffiup Sinniisoqarfia imaluunniit Najukkami Eqqartuussivik. Akilersuutit annertussusissaat aamma nammineerluni isumaqatigiissutigineqarsinnaapput.

Akilersuutit Naalagaaffiup Sinniisoqarfiani aalajangersarneqarsimappata, allannguiniarluni qinnuteqarnermut immersugassaq immersorneqassaaq. Immersugassaq nittartakkami uani nassaarineqarsinnaavoq (link). Immersugassaq aamma Naalagaafiup Sinniisoqarfianut aaneqarsinnaavoq - Nuup avataaniikkaanni illoqarfinni politeeqarfinnut aaneqarsinnaavoq.

Immersukkamut ilanngunneqassapput pappialaatit (dokumenter) pisariaqartut tamarmik. Immersugassami allaqqavoq suut pisariaqartinneqassanersut. Pappilissat pisariaqartut tamaasa ilanngullugit immersugassaq naammassisimanngikkaanni taava qinnuteqaat suliarineqarsinnaassanngilaq.

Qinnuteqaat Naalagaaffiup Sinniisoqarfianut imaluunniit najukkami politeeqarfimmut nammineerluni tunniunneqassaaq imaluuniit allakkatigut nassiunneqassalluni.

Malugiuk: Naalagaaffiup Sinniisoqarfia aqqutigalugu averusersimagaanni imaaluunniit avissimagaanni, isumaqatigiissutigineqarsimappallu Naalagaaffiup Sinniisoqarfiata akilersuutissatut isumaqatigiissutit allanngortissinnaassanngikkai, taava taamaallaat Najukkami Eqqartuussivik aqqutigalugu allannguisoqarsinnaavoq.

Akilersuutissat annertussusissaat Najukkami Eqqartuussivimmi aalajangerneqarsimappata allanngortikkumagaannilu, taava Najukkami Eqqartuussivimmut saaffiginnissutigineqassapput.

ATUUKKUNNAARSITSINEQ

Ingerlaannartumik akilersuutit atorunnaassapput imannak pisoqarpat:

· Akilersuisoq toquppat

· Akilersuutinik pisartoq allamik aappaqalerpat imal. toquppat