Averuserneq/Avinneq

Averuserneq avinnerlu pillugit ilitsersuut uani atuarsinnaavat

 

Averuserneq

 

Katissimalluni aappaasoq inooqatigiinneq ingerlaqqissinnaanngitsoq isumaqartoq averusersinnaatitaavoq. Averusernermi katissimalluni appaariinnerup/nalunaarsugaasumik inooqatigiinnerup inatsiseqartitsinikkut sunniutai amerlanerpaat atorunnaartarput. Tamanna aningaasaatinik ataatsimoorussineq, kingornussiffigeqatigiissinnaatitaaneq ilumoorfigeqatigiittussaatitaanerlu eqqarsaatigalugit atuuppoq, taamaakkaluartorli katissimalluni aappariinneq/nalunaarsugaasumik inooqatigiinneq suli atuulluni. Averusernerup sunniutai siunnissami atorunnaartarput katissimallutik aappariit/nalunaarsugaasumik inooqatigiit aappariinnertik/inooqatigiinnertik nangeqqippassuk. Taamaalisoqarpat katissimalluni aappariinnerup/nalunaarsugaasumik inooqatigiinnerup inatsiseqartitsinikkut sunniutai atuutileqqissapput. Averuserniarnermi immersugassaq una atorneqassaq.

 

Avinneq

 

Katissimalluni aappaasoq/nalunaarsugaasumik inooqataasoq ukiumi ataatsimi averusersimareernerup kingornatigut avissinnaatitaalersarpoq. Katissimallutik aappariit/nalunaarsugaasumik inooqatigiit tamanna isumaqatigiissutigigunikku qaammatit arfinillit qaangiunneranni avissinnaatitaalersarput. Pisuni aalajangersimasuni averuseqqaanngikkaluarluni avissinnaatitaasoqartarpoq. Avinniarnermi immersugassaq una atorneqassaaq.

 

Ukiuni marlunni avissaarsimaneq

 

Katissimallutik aappariit/nalunaarsugaasumik inooqatigiit isumaqatigiissinnaannginnertik pissutigalugu ukiuni kingullerni marlunni avissaarlutik inuusimagunik avissinnaatitaalersarput. Uppernarsaat aammaimmersugassaq una atorneqassapput.

 

Allasiorneq

 

Katissimalluni aappaasoq/nalunaarsugaasumik inooqataasoq avissinnaatitaalersarpoq aappaasoq/inooqataasoq allasiorsimappat, aappaasup/inooqataasup allasiorneq akuersaarsimanngippagu imaluunniit pisinnaatitaaffini kingusinnerusukkut iperarsimanngippagu.Uppernarsaat aammaimmersugassaq unaatorneqassapput.

 

Annersaaneq/nakuuserneq immaqalunnit tarnikkut persuttarneqarneq

 

Katissimalluni aappaasoq/nalunaarsugaasumik inooqataasoq avissinnaatitaalersarpoq aappaasoq/inooqataasoq aappaminut/inooqamminut meeqqanulluunniit piaaraluni annertuumik annersaasimappat/nakuusersimappat immaqalunnit tarnikkut persuttasimappat – taamaattorli qinnuteqaat aappaasup/inooqataasup iliuuseqarnermik ilisimasaqalerneranit ukioq ataaseq qaangiutsinnagu iliuuserineqarsimasullu kingorna ukiut pingasut qaangiutsinnagit tunniunneqarsimassaaq.

 

Marlunnik nuliaqarneq/ueqarneq aamma inooqateqarneq

 

Katissimalluni aappaasoq/nalunaarsugaasumik inooqataasoq avissinnaatitaalersarpoq aappaasoq/inooqataasoq allamut katissimappat/allamik inooqateqalersimappat – tamannalu sioqqullugu katissimaneq/nalunaarsugaasumik inooqateqarlersimaneq suli atuuppat.

 

Averusernermi avinnermilu periaatsit

 

Naalagaaffiup Sinnissaata akuersissuteqarneratigut eqqartuussiviulluunniit eqqartuussuteqarneratigut Kalaallit Nunaanni avittoqarsinnaavoq. Katissimallutik aappariit/nalunaarsugaasumik inooqatigiit averusernissaq avinnissarluunniit isumaqatigiissutigippassuk piumasaqaatasullu isumaqatigiissutigippatigit averusernissaq avinnissarluunniit akuersissutigineqarsinnaavoq. Naalagaaffiup Sinniisaa Nuummi saaffigineqartarpoq, Nuullu avataani politiit saaffigineqartarlutik, taakkulu suliani ilaqutariinneq pillugu inatsiseqartitsinermut tunngasuni Naalagaaffiup Sinniisaa sinnerlugu iliuuseqartartuupput. Illua’tungeriit isumaqatigiissinnaanngippata eqqartuussisoqarnissaaluunniit kissaatigippassuk Kalaallit Nunaanni eqqartuussiviit saaffigineqassapput.

 

Piumasaqaatit isumaqatigiinniutigineqarneri

 

Averusernerup avinnerulluunniit akuersissutigineqannginnerani piumasaqaatit Naalagaffiup Sinniisaani Nuummi Nuullu avataani politiini suliani ilaqutariinneq pillugu inatsiseqartitsinermut tunngasuni Naalagaaffiup Sinniisaa sinnerlugu iliuuseqartartuni isumaqatigiinniutigineqassapput. Illua’tungeriit illoqarfinni assigiinngitsuni najugaqarpata piumasaqaatit isumaqatigiinniutigineqarneri taakkunani tamani ingerlanneqassapput, tassami pisariaqarpat piumasaqaatit pillugit arlaleriarluni isumaqatigiissitsiniartoqarsinnaasarmat. Illua’tungeriit piumasaqaatit pillugit isumaqatigiinniarnernut aggeqquneqartarput, tamatuma Naalagaaffiup Sinniisaanut politiinulluunniit qinnuteqaatigineqarnerata kingornatigut.

 

Akuersissuteqarnikkut averusernermi avinnermilu piumasaqaatit

 

Averusernermut avinnermullu atatillugu piumasaqaatit makku pillugit aalajangiisoqartarpoq:

 

· meeqqamut akilersuutit

 

· aapparisamut akilersuisussaatitsisoqassanersoq

 

· ataatsimoorussamik ineqartoqarsimappat inimik atuisinnaatitaaneq

 

· ataatsimut pigisanik agguaaneq