Katittarneq / inooqatigiittut nalunaarsorsimasut

Katinnikkut/nalunaarsugaasumik inooqatigiinnikkut aappariilerneq

Katititsinissamut pisinnaatitaaneq

Katissimalluni aappariinnermut piumasaqaatit eqqortinneqarsimasut katittoqannginnerani uppernarsarneqassaaq. Katissimalluni aappariinnermut piumasaqaatit eqqortinneqarsimanerannik misiliineq palasip najukkamiluunniit borgmesterip suliarisarpaa. Nalunaarsugaasumik inooqatigiinnermut piumasaqaatit eqqortinneqarsimanerannik misiliisitsineq najukkami borgmesterimut saaffiginninnikkut pisinnaavoq.

Katinnikkut aappariilerneq oqaluffimmi katinnikkut oqaluffiulluunniit avataani palasiunngitsumit katitinneqarnikkut pisarpoq. Nalunaarsugaasumik inooqatigiilersitsineq najukkami borgmesterimit suliarineqartarpoq. Palasit borgmesterillu innersuussutigineqarput. Ilagiit naalagaaffimmit illersugaasut avataatigut upperisarsioqatigiinni akuerisaasuni palasimit katitinneqarnissamik kissaateqarneq palasimut pineqartumut saaffiginnilluni saqqummiunneqassaaq. Kommunit aggorneqarnerisa avataanni katititsinerit/nalunaarsugaasumik inooqatigiilersitsinerit aamma taakkununnga piumasaqataasunik eqqortitsinermik misiliinerit, inuusuttuaqqamut katinnissamik kissaateqarneq kiisalu kingornussassat suliarineqannginnissaannik qinnuteqaatit Naalagaaffiup Sinniisaata suliassaqarfiata ataaniipput.

Kommunit aggornerisa avataanni

Naalagaaffiup Sinniisaa kisimi sumiiffinni kommunit aggornerisa avataanniittuni katinnikkut aappariilermut/nalunaarsugaasumik inooqatigiilernermut piumasaqaatit eqqortinneqarnerannik misiliinissamut aamma katititsinissamut/nalunaarsugaasumik inooqatigiilersitsinissamut inunnik allanik piginnaatitsinissamut pisinnaatitaavoq. Pituffimmi Thule Air Base eqqarsaatigalugu Grønlands Kommandop Thule Air Basemi attaveqaatitut atorfeqartitaa saaffigineqartassaaq.

Inuusuttuaqqat

18-inik ukioqalersimanngitsoq Naalagaaffiup Sinniisaa akuersiteqqaarnagu katinnikkut aappaqalersinnaanngilaq/aapparineqalersinnaanngilaq.

Kingornussassanik suliarinninngitsoorneq

Katissimalluni aappaqarsimasoq kingornussassat pisortatigoortumik nammineerluniluunniit suliarineqareersimatinnagit katinnikkut aappaneqqissinnaanngilaq. Aalajangersagarli taanna saneqqunneqarsinnaavoq, pissutsit immikkut ittut tamanna ajornartinngippassuk, Naalagaaffiup Sinniisaata akuersissuteqarneratigut.