Angajoqqaat oqartussaassuseqarnerat

Angajoqqaat akisussaanerat pillugu inatsit

 

Angajoqqaat akisussaanerat pillugu inatsit ulloq 1. juli 2016-imi Kalaallit Nunaanni atuutilersinneqarpoq. Angajoqqaat oqartussaassuseqarnerat, meeqqap najugaa meeqqallu najorteqarsinnaatitaaneranik apeqqut inatsisikkut iluarsiivigineqarpoq.

 

Angajoqqaat akisussaanerat pillugu inatsit malillugu meeraq pillugu aalajangigassat meeqqamut pitsaanerusussaq tunngavigalugu aalajangerneqartassapput tamatigullu meeqqap isumai mianerineqartassallutik.

 

Angajoqqaat oqartussaassuseqarnerat

 

Angajoqqaat oqartussaassuseqarnerat pillugu isumaqatigiissutit Kalaallit Nunaanni nalunaarsorneqartassapput imaluunniit naalagaaffiup Kalaallit Nunaanni sinniisuanit akuersissutigineqartassallutik.

 

Angajoqqaat katissimasut tunngaviatigut ataatsimoorlutik angajoqqaatut oqartussaassuseqarput.

Meeqqap inunngornerani angajoqqaat averusersimagunik anaanaasoq kisimi angajoqqaatut oqartussaassuseqassaaq ataataasup ataataassusia akuerineqarnikkut imaluunniit eqqartuussutikkut aalajangiunneqarsimanngippat.

 

Angajoqqaat katissimanngitsut ataatsimoorlutik angajoqqaatut oqartussaassuseqassapput tamanna pillugu isumaqatigiissuteqarnertik Naalagaaffiup Sinniisuanut nalunaarutigigunikku.

 

Aamma angajoqqaat ataatsimut angajoqqaatut oqartussaassuseqassapput meeqqap inunngunnginnerani qaammatini 10-ni kingullerni innuttaasut nalunaarsuiffiatigut ataatsimut najugaqatigiippata najugaqatigiissimappataluunniit aamma ataataasup ataataassusia akuerineqarnikkut imaluunniit eqqartuussutikkut aalajangiunneqarsimappat.

 

Taamaattoqanngippat anaanaasoq kisimi angajoqqaatut oqartussaassuseqassaaq.

 

Angajoqqaatut oqartussaassuseqarneq pillugu isumaqatigiissutit.

Angajoqqaatut oqartussaassuseqarneq pillugu makku isumaqatigiissutigineqarsinnaapput:

 

- Ataatsimut angajoqqaatut oqartussaassuseqarnissaq pillugu isumaqatigiissut

- Ataatsimut angajoqqaatut oqartussaassuseqarnerup atorunnaarsinneqarnissaa pillugu isumaqatigiissut aamma angajoqqaajusut arlaat ataaseq kisimi angajoqqaatut oqartussaassuseqalissasoq

- Angajoqqaatut oqartussaanerup angajoqqaajusut aappaaniit appaanut nuunneqarnera pillugu isumaqatigiissut.

 

Isumaqatigiissutit taakku atorsinnaassagunik naalagaaffiup Kalaallit Nunaanni sinniisuanut nalunaarutigineqarsimassapput. Angajoqqaatut oqartussaassuseqarneq pillugu isumaqatigiissutip eqqartuussivimmi suliarineqarnerata nalaani isumaqatigiissut eqqartuussivimmut nalunaarutigineqarsimassaaq.

 

Angajoqqaat isumaqatigiissutigisinnaavaat angajoqqaatut oqartussaassuseqarneq allanut angajoqqaajunngitsunut nuunneqassasoq. Isumaqatigiissutit taakku atorneqarsinnaassagunik Naalagaaffiup Sinniisuanit akuersissutigineqarsimassapput.

 

Isumaqatigiissutissanut qulaani pineqartunut immersugassat (ilitsersuutitallit) ataani aaneqarsinnaapput imaluunniit Naalagaaffiup Kalaallit Nunaanni Sinniisoqarfiani politeeqarfimmiluunniit pissarsiarineqarsinnaallutik.

Angajoqqaatut oqartussaaqatigiittutut isumaqatigiinnermut nalunaarutiginninneq

 

Angajoqqaatut oqartussaaqatigiittutut isumaqatigiissutip atorunnaarsinneqarnissaanut nalunaarutiginninneq

 

Angajoqqaatut oqartussaanerup angajoqqaap aappaanut nuun-neqarnissaanut isumaqatigiinnerup nalunaarutigineqarnera

 

 

Najorteqarneq

Najorteqarneq pillugu isumaqatigiissutit Kalaallit Nunaanni tamatigut eqqartuussivimmi aalajangiunneqartassapput.

Meeraq kinaluunniit pisinnaatitaaffeqarpoq angajoqqaani tamaasa attaveqarfigisarsinnaassallugit. Angajoqqaajusut najugaqatigiinngippata, meeraq pisinnaatitaaffeqarpoq angajoqqaat arlaat meeqqap najugaqarfiginngisaa najussallugu.

Angajoqqaajusoq meeqqap najugaqarfiginngisaa eqqartuussivimmut qinnuteqaateqarsinnaasoq najortaanissap aalajangiiffigineqarnissaanut.

 

Qinnuteqaateqarfigineqarnikkut najorteqarneq eqqartuussiviup allanngortissinnaavaa.

 

Meeqqap najugaa

 

Meeqqap najugaa pillugu aalajangiinissaq Kalaallit Nunaanni tamatigut eqqartuussivimmit aalajangerneqartassaaq.

 

Meeqqap angajoqqaavi ataatsimoorlutik angajoqqaatut oqartussaassuseqarunik meeraq sumi najugaqassanersoq angajoqqaajusut ataatsimoorlutik aalajangissavaat.

 

Angajoqqaajusut arlaat ataaseq angajoqqaatut kisimiilluni oqartussaassuseqarpat meeraq sumi najugaqassanersoq taassuma kisimi aalajangersinnaavaa.

Angajoqqaajusup nammineq imaluunniit meeqqap najugaa nunami maani imaluunniit nunami allami allanngortinniaruniuk tamanna angajoqqaajusup aappaanut nalunaarutigissavaa kingusinnerpaamik nuunnissaq sapaatit akunnerinik 6-nik sioqqullugu.

 

Meeraq sumi najugaqassanersoq qinnuteqaateqarfigineqareernikkut eqqartuussiviup aalajangersinnaavaa.