Nammineersinnaassuseqalersimanngitsut aningaasaataat

Kalaallit Nunaanni nammineersinnaatitaanngitsut aningaasaataannik nakkutilliineq

 

Nammineersinnaatitaaneq pillugu inatsisip Kalaallit Nunannut atortuulersinneqarnera pillugu inatsimmi nr. 306-imi, 14. maj 1993-imeersumi § 50-ikkut aalajangersarneqarpoq Kalaallit Nunaanni nakkutilliisoqartitsinermik nakkutiginninneq justitsministerimit (Civilstyrelsimit) isumagineqassasoq.

 

Nakkutilliisoqartitsinerit justitsministerip (Civilstyrelsip) Naalagaaffiup Kalaallit Nunaanni Sinniisaanut justitsministeri sinnerlugu nakkutiginissaannut piginnaatitsissutigisai Naalagaaffiup Sinniisaata nakkutigisarai.

 

Naalagaaffiup Sinniisaata nammineersinnaatitaanngitsut aningaasaataannik nakkutiginninnera aningaasat tunniunneqarnissaannik qinnuteqaatinuinnaq atuutinngilaq, aammali ass. akuersissutit aalajangersimasut aamma nammineersinnaatitaanngitsoq sinnerlugu pigisanik aalaakkaasunik pisinerup tunisinerullu akuerineqartarneri ilaatinneqarlutik.

 

Nammineersinnaatitaanngitsup aningaasaataanik inissiineq

 

Nammineersinnaatitaanngitsup aningaasaatai tamarmik (taamaattorli aningaasat 18.000 kr.-it ikinnerusut pineqaratik) ingerlatsiveqarfittut suliffeqarfimmi nammineersinnaatitaanngitsup aningaasaataanik aqutsisussatut Civilstyrelsip akuerisaani kontomut ikineqassapput. Naalagaaffiup Kalaallit Nunaanni Sinniisaa akuersiseqqaarnagu aningaasanik – aningaasanik uninngasuutinik isertitanilluunniit – tigusisoqarsinnaanngitsoq kontomi toqqorsivimmiluunniit allassimasoqassaaq. Nakkutilliisoqartitsineq atuukkallartillugu tamanna atuutissaaq.

 

Nammineersinnaatitaanngitsup aningaasaataasa tamarmik ilaasaluunniit tunniunneqarnissaannik qinnuteqaatit

 

Aningaasat tamarmik ilaalluunniit aatsaat tunniunneqarsinnaapput nakkutilliisup qinnuteqaateqarneratigut, qinnuteqaallu taanna suliani Naalagaaffiup Kalaallit Nunaanni Sinniisaata nakkutigissallugit piginnaatitaaffigisaani Naalagaaffiup Kalaallit Nunaanni Sinniisaanut tunniunneqassaaq. Aningaasanik tunniussisoqarsinnaanerani apeqqummi pisumi naliliineq aalajangiisuusarpoq. Allaffissornikkut aqutsinermi maleruaqqusanik Naalagaaffiup Sinniisaata naliliineranik aalajangersaaviginnittunik aalajangersaasoqarsimanngilaq.

 

Ukiukinnerusut eqqarsaatigalugit aningaasaatit inuusuttup 18-inik ukioqalernerani ilanngaateqartinnagit tunngaviusumik tunniunneqarsinnaasariaqarput.

 

Nammineersinnaatitaanngitsup aningaasaataanik tunniussisoqarnissaanik qinnuteqarnermi immersugassaq una atorneqassaaq. Immersugassamik atuineq pinngitsaaliissutanngilaq.

 

Qinnuteqaalli pisuni tamani inuk pillugu paasissutissanik imaqassaaq, matumani nakkutigineqartup qassinik ukioqarnera aningaasallu qanoq amerlatigisut tunniunneqarnissaat kissaatigineqarnersoq ilanngullugit eqqarsaatigalugit, taamatuttaarlu aningaasanik tunniussinerup suna siunertarineraa sukumiisumik tunngavilersugaassalluni. Aningaasat amerlassusiat qinnuteqaammi uppernarsaaserneqartariaqarpoq. Pisuni aalajangersimasuni immikkut pisariaqartitsinermut tunuliaqutaasoq pillugu avataaneersunit oqaaseqaateqartitsineq naleqquttuusinnaavoq.

 

Qinnuteqaat ukiukinnerusumut tunngasuuppat angajoqqaavisa aningaasaqarnerat, isertitaat aningaasaataallu pillugit nassuiaasoqartariaqarpoq, taamatuttaarlu angajoqqaat ukiumi kingullermi isertitaasa naatsorsorneqarnerat ilanngullugu nassiunneqartariaqarluni. Tamatumunnga tunuliaqutaasoq tassaavoq meeqqap angajoqqaavisa meeqqamut tamarmik immikkut pilersuisussaatitaanerat.

 

Aningaasanik tunniussinerup kingornatigut ingerlatsivittut immikkoortortaqarfimmi 18.000 kr.-nit ikinnerusut sinnerussimappata aningaasaatit tamarmik nakkutilliisumut aqutassanngorlugit tunniunneqassapput.

 

Kina nakkutilliisuua?

 

Nakkutilliisoq eqqartuussisumit (kredsdommerimit) toqqarneqartarpoq.

 

Meeqqat inuusuttullu 18-inik ukioqalersimanngitsut eqqarsaatigalugit angajoqqaatut oqartussaassutsimik tigummiaqartut (-toq) nakkutilliisuusarput. Angajoqqaatut oqartussaassutsimik tigummiaqartut (-toq) toqqagaanngikkaluarlutik nakkutilliisuusarput.

 

18-it inorlugit ukiullit katissimasut eqqarsaatigalugit angajoqqaatut oqartussaasusermik manna tikillugu tigummiaqartuusut (-soq) nakkutilliisuusarput.

 

Angajoqqaat angajoqqaatut oqartussaasusermik ataatsimut tigummiaqartuugunik marluullutik nakkutilliisuussapput.

 

Angajoqqaatut oqartussaasuseq ataatsimoorunneqarpat tigummiaqartullu aappaa nammineersinnaassuseqanngippat nakkutilliisoqartinneqarpalluunniit, imaluunniit nakkutilliisinnaajunnaarsinneqarsimappat angajoqqat aappaat kisimiilluni nakkutilliisuussaaq. Angajoqqaatut oqartussaasutsimik tigummiaqartoq kisermaajuppat, angajoqqaatulluunniit oqartussaassutsimik tigummiaqartut marluullutik nammineersinnaasuseqanngippata nakkutilliisoqartinneqarpataluunniit, pineqartulluunniit nakkutilliisinnaajunnaarsinneqarsimappata nakkutilliisussamik toqqaasoqassaaq.

 

Nakkutilliisup pisussaaffii

 

Allatut immikkut aalajangiisoqarsimanngippat nammineersinnaassuseqanngitsup aningaasaatai nakkutilliisup aqussavai, aningaasaatillu eqqarsaatigalugit inatsiseqartitsinermut tunngasuni nammineersinnaassuseqanngitsoq sinnerlugu iliuuseqartartuussalluni.

 

Nammineersinnaassuseqanngitsup aningaasaatai nakkutilliisumit aqunneqanngippata aningaasat toqqortarineqarnerat erniortinneqarnerallu nammineersinnaassuseqanngitsullu pisariaqartitaanut atorneqarnissaat nakkutilliisup naleqquttumik isumagissavaa.

 

Nammineersinnaasuseqanngitsup soqutigisai nakkutilliisup peqqissaartumik sapingissamillu pitsaasumik isumagissavai.

 

Nammineersinnaasuseqanngitsup annaasai nakkutilliisup piaaraluni piarinaatsoornikkulluunniit iliuuseqarneratigut pilersut nakkutilliisup taarsissallugit pisussaaffigaa.

 

Nammineersinnaasuseqanngitsut 15-it sinnerlugit ukiullit

 

Pisuni pingaartuni nakkutilliisup nammineersinnaasuseqanngitsoq 15-inik ukioqalersimappat sapinngisamik oqaaseqaateqartinniassavaa, nammineersinnaassuseqanngitsorlu katissimasaminik inooqatigisaminillu aappaqarpat taanna aamma oqaaseqaateqartinniassallugu.

 

Naalagaaffiup Sinniisaata nammineersinnaassuseqanngitsoq aningaasaatinik tunniussisoqarnissaanik qinnuteqaatit suliarineqarnerinut ilaatillugu pisut qanoq ittuunerat aalajangiisuutillugu tusaarniaavigissavaa.

 

Immersugassat

 

Nammineersinnaassuseqanngitsup aningaasataanik tunniussisoqarnissaanik qinnuteqaateqarnermi immersugassaq uani nassaarineqarsinnaavoq.