Meeqqamut akilersuutit pillugit ilitsersuut uani atuarsinnaavat
Akilersuutinut suliassaqarfimmut
Kalaallit Nunaanni akilersuisarnermut suliassaqarfik tamaat ulloq 1. april 2024 Naalagaaffiup Sinniisoqarfiata tigussavaa.
Tamaanna isumaqarpoq, Naalagaaffiup Sinniisoqarfiata, siunissami akilersuutinut tunngasut suliat nutaat tamaasa, oqartussaaffittut kisiartaalluni tigusalissagai.
Najukkami eqqartuussivinni suliat ingerlasooreersut tamarmik, najukkami eqqartuussivinnit naammassineqartassasut, Naalagaaffiup Sinniisoqarfianit eqqaaneqarpoq.
Meeqqap 18-inik ukioqalernissaata tungaanut akilersuutit
Angajoqqaat ataatsimut meeqqamik pilersornissaanut tamarmik immikkoorlutik pisussaaffeqarput. Akilersuisussaatitaaneq meeqqap 18-inik ukioqalernerani atorunnaartarpoq, taamaattorli ataani ilinniagaqarnermut atatillugu akilersuutit takukkit. Meeraq angajoqqaat inuunerminni atugaat meeqqamullu suna pitsaanerpaassasoq isiginiarlugit pilersorneqassaaq, perorsarneqassalluni ilinniartinneqassallunilu. Panimmut akilersuineq pineqartoq 18-inik ukioqalinnginnermini katippat unissaaq, allanik aalajangersaasoqarsimanngippat.
Pilersuisussaatitaaneq
Angajoqqaat ataatsimut meeqqamik pilersornissaanut tamarmik immikkoorlutik pisussaaffeqarput. Angajoqqaat arlaata meeqqamut pilersuisussaatitaanini eqqortinngippagu angajoqqaap aappaata aapparmi meeqqap pilersorneqarneranut akilersuisussanngortinneqarnissaa qinnutigisinnaavaa.
Meeqqamut akilersuisussanngortitsisoqarnissaa kia aalajangersaqqusinnaavaa?
Angajoqqaat arlaata meeqqamik najugaqateqartup pilersuinermilluunniit annertunerpaatigut isumagisaqartup akilersuisoqarnissaanik aalajangiisoqarnissaa qinnuteqaatigisinnaavaa. Malittarisassatut pingaarnertut atuuppoq pineqartup meeraq inatsit tunngavigalugu paarsarissagaa/tigummisarissagaa.
Akilersuisoqarnissaanik aalajangiinerit
Meeqqap angajoqqaavi katissimappata katissimallutilluunniit siusinnerusukkut aappariissimappata akilersuisoqassasoq aalajangiisoqarnissaa Naalagaaffiup Sinniisaanut Nuummi qinnuteqaatigineqartarpoq, Nuullu avataaniikkaanni Naalagaaffiup Sinniisaanut toqqaannartumik imaluunniit politiit apeqqutini ilaqutariit pillugit inatsiseqartitsinermut tunngasuni Naalagaffiup Sinniisaa sinnerlugu iliuuseqartartuusut aqqutigalugit qinnuteqaatigineqartarluni. Qinnuteqaat ”Ilitsersuutit immersugassallu” ataanni takuuk.
Akilersuisussaatitaaneq avinnermut averusernermullu atatillugu aalajangersarneqartarpoq, akuersissummut atatillugu piumasaqaatitut, eqqartuussiviullu eqqartuussutikkut aalajangiineratigut.
Meeraq aappariinnerup avataatigut inunngorsimappat qinnuteqaat akilersuutinik tigusisinnaatitaasup najugaqarfiani eqqartuussivimmut tunniunneqassaaq.
Akilersuutinik tigusisinnaatitaasoq Danmarkimi najugaqarpat qinnuteqaat aalajangersimasumik periaaseq malillugu Naalagaaffiup Sinniisaanut nassiunneqassaaq, akilersuisussaatitaasoq Kalaallit Nunaanni najugaqarpat.
Meeqqamut akilersuutit piffissaq qinnuteqarfik ukiumik ataatsimik sioqqullugu kingumut atuuttumik taamaallaat aalajangersarneqarsinnaapput.
Meeqqamut akilersuutit nalinginnaasut
Kalaallit Nunaanni meeqqamut akilersuutit nalinginnaasut aningaasartaasa amerlassusiat Kalaallit Nunaanni Namminersorlutik Oqartussanit aalajangersarneqartarpoq, massakkullu ukiup affaanut 6.138 kr.-iullutik, imaluunniit qaammammut 1.023 kr.-iullutik.
Danmarkimi meeqqamut akilersuutit aningaasartaasa amerlassusissaat Social- og Integrationsministereqarfimmit aalajangersarneqartarpoq. Aningaasartat taakku Danmarkimi ukiut tamaasa 1. januarimi iluarsiissuteqarfigineqartarput.
Meeqqamut akilersuutit nalinginnaasut kommunimit akilersuutinik tigusisinnaatitaasup najugarisaanit malittarisassat immikkut ittut tunngavigalugit siumoortumik tunniukkallarneqarneqarsinnaapput.
Meeqqamut akilersuutit akilersuutinit nalinginnaasunit qaffasinnerusut
Ankestyrelsip meeqqamut akilersuutit qaffatat aalajangersarneqartarnerat pillugu ilitsersuutaa Naalagaaffiup Sinniisaata malittarpaa – tamanna pillugu Ilaqutariinnermik Aqutsisoqarfiup nittartagaa (OBS)takusinnaavat. Meeqqamut akilersuutinik qaffatanik akilersuisussanngortitsisoqarsinnaavoq, akilersuisussaatitaasoq isertitarissaartuuppat.
Meeqqamut akilersuutinik allanngortitsineq
Meeqqamut akilersuutit sukkulluunniit allanngortinneqarsinnaapput, tamanna pillugu tunngavilersugaasumik qinnuteqaateqartoqarpat. Allanngortitsineq aalajangiinerup kingornatigut ullormit akiliiffissamit siullermit aallartittumik atuutilerajuttarpoq.
Meeqqamut immikkut akilersuutit
Naartup erniunerani, il.il., meeqqap atserneqarnerani, kusinnera ilanngullugu, meeqqap apersortinnerani imaluunniit apersortittussanngorfiani – immikkulluunniit illuinnartumik pissuteqartumik – allaluunniit immikkorluinnaq ittoq pissutigalugu apersortittussaajunnaarfiani aningaasartuutaasut pissutigalugit immikkut akilersuutissiineqarsinnaavoq.
Meeqqap apersortiffissaa qaammatit pingasunngunnginneranni kingusinnerpaamillu ulloq ataaseq sioqqlugu apersortittumut akilersuutinik aalajangersaasoqaqqullugu qinnuteqartoqarsinnaavoq.
Piffissaliussat eqqornagit qinnuteqartoqartillugu apersortittumut akilersuutinik aalajangersaasoqarnissaanik qinnuteqaatit Naalagaaffiup Sinniisoqarfiata itigartissinnaavai.
Meeqqap apersortittussanngorfiata nalaanut akilersuutinik qinnuteqartoqarpat – taannali apersortittussaagani – akilersuutit qinnutigineqarsinnaapput ullormi meeqqap 13-nik ukioqalerfissaaniit aamma 15-nik ukioqalerfissaaniit.
Meeqqap napparsimaneranut aamma ilisaaneranut imaluunniit immikkut ittumik pissutilimmut atatillugu akilersuutit qinnuteqaatigineqareersimassapput, aningaasartuutaasut akilerneqarneranniit qaammatit pingasun-ngortinnagit piumasarisaq saqqummiunneqarpat, piffissarititap taassuma akimorneqarnissaanut naammaginartumik pissutissaqarnera uppernarsarneqanngippat.
Ilinniarnermut atatillugu akilersuutit
Akilersuisussaatitaaneq meeqqap 18-inik ukioqalernerani atorunnaartarpoq. Taamaattorli meeqqap 24-nik ukioqalernissaata tungaanut atuarnermut ilinniarnermulluunniit atatillugu akilersuisussanngortitsisoqarsinnaavoq. Atuartitsinermut atatillugu akilersuisussanngortitsisoqassanersoq aalajangiiniarneq meeqqap isertitai (matumani ilinniagaqarnersiutit/SU-t ilanngullugit eqqarsaatigalugit) kiisalu anaanaasup ataataasullu isertitaat pillugit ataatsimut naliliineq tunngavigalugu pisarpoq.
Meeqqamut akilersuutit pillugit malittarisassat
Ankestyrelsip ilaqutariinneq pillugu inatsiseqartitsinermut immikkoortortaqarfiata nittartagaa (OBS) takuuk.
