Nammineq aningaasartuutiginagu eqqartuussisulersuussisarneq

Nammineq aningaasartuutiginagu eqqartuussisulersuussisarneq

Innuttaasut ataasiakkaat eqqartuussivinnut suliassanngortitsisinnaatitaanerat qulakkeerniarlugu naalagaaffik aningaasanik ikiorsiisarpoq. Taamaalilluni nammineq aningaasartuutiginagu eqqartuussisulersuussisarnermi inuit aningaasakinnerusut inuit akissaqarnerusut naligalugit eqqartuussisulersuussisinnaanissaat periarfissinneqarpoq.

Najukkani eqqartuussivinni, Kalaallit Nunaani Eqqartuussivimmi aamma Nunatta Eqqartuussiviani suliassanngortitsinerit nammineq aningaasartuutiginnginnissaat Kalaallit Nunaanni Naalagaaffiup Sinniisuata nalunaarutigisarpaa. Danskit eqqartuussiviini suliassanngortitsinermi Kalaallit Nunaanni najugallit nammineq aningaasartuutiginagu eqqartuussisulersuussinissamik qinnuteqaatertik naalagaaffiup sinniisoqarfianut tunniussinnaavaat. Eqqartuussiviit Qullersaanni (Højesteretimi) suliassanngortitsinerit nammineq aningaasartuutiginnginnissaat justitsministerimit nalunaarutigineqartarput.

Inuk qinnuteqareernermigut nammineq aningaasartuutiginagu eqqartuussisulersuussisinnaatitaavoq, ima pisoqarpat

1) inuk eqqartuussisulersuussinissamut naammaginartumik tunngavissaqartutut isigineqartoq,

2) eqqartuussisulersuussinissami inatsisilerituumik ikiorteqarnissaq pisariaqartutut isigineqartariaqarpat aamma

3) eqqartuusisulersuussinermi inatsisilerituumik ilinniarsimasumik ingerlatsisussamik suliaqartitsinermut aningaasartuutinik inummut artukkiutaavallaanngitsumik pineqartoq akiliisinnaappat.

Qinnuteqaateqartup eqqartuussisulersuussinissamut naammaginartumik tunngavissaqarnerata naalagaaffiup sinniisoqarfianit nalililerneqarnerani ilaatigut ilanngunneqassapput suliap qinnuteqaateqartumut pingaaruteqassusia, suliami qinnuteqaateqartup tapersersorneqarnissaa ilimanaateqarnersoq, suliami pisap annertussusia, aningaasartuutissatut naatsorsuutigisat annertussusiat, suliap allaffissornikkut suliarineqarsinnaanera periarfissaanersoq aamma atuisartut naammagittaalliuuteqartarfiatigut, ineqarneq pillugu naammagittaalliuuteqartarfikkut imaluunniit allamik naammagittaalliorfigisinnaasamik suliassanngortitseqqiffiusinnaasumilluunniit taamaaqataanut aalajangiisussanngortitsisinnaaneq periarfissaanersoq.

Nammineq aningaasartuutiginagu eqqartuussisulersuussinissaq nalunaarutigineqarsinnaavoq, qinnuteqaateqartup tunngaviusumik isertitai 2017-imi isertitat nalunaarsorneqarnerat tunngavigalugu 329.000 kr.-iuppat annikinneruppalluunniit.

Qinnuteqaateqartoq inooqateqarpat nammineq aningaasartuutiginagu eqqartuussisulersuussinissaq nalunaarutigineqarsinnaavoq, inooqatigiit tunngaviusumik isertitaat katillugit 418.000 kr.-iuppata annikinneruppataluunniit. Inooqatigiit suliami soqutigisaat akerliuppata, qinnuteqaateqartup nammineq tunngaviusumik isertitai aamma kisimiittut isertitassaattut killiliussat atorneqarsinnaapput.

Meeqqamut ataatsimut, ilanngullugit qitornassat qitornarsiallu 18 inorlugit ukiullit qinnuteqaateqartumi najugallit imaluunniit taassumannga pilersorneqarnerusumut isertitassatut killissarititat 57.000 kr.-inik qaffanneqassapput.

Qinnuteqaateqartup isertitaanit nalunaarsukkanit qinnuteqaateqartup isertitai allaanerungaatsiarpata isertitaviit annertussusiat tunngavigineqassaaq. Tamatuma kingorna qaammatini kingullerni 3-ni akissarsiat allagartaat assigisaalluunniit naalagaaffiup sinniisoqarfiata piumassavai.

Nammineq aningaasartuutiginagu eqqartuussisulersuussinerup nassatarissavaa pisortat akiligaannik suliap ingerlannissaanut advokatimik imaluunniit inatsisilerituumik allamik ivertitsinissaq, eqqartuussiviup atorneranut akitsuutinik akiliisussaannginneq, suliami paasissutissat pillugit akerlerisamut taarsiissuteqartitaannginnissaq aamma suliap suliarineqarnissaanut imaluunniit paasissutissat pissarsiarinissaannut iliuuserisariaqarsimasut pillugit pisortat aningaasartuutaannut akiliuteqannginnissaq.

Eqqartuussiviup aalajangiineranut atatillugu aningaasat pisortat matussusigassaasa annertussusissaat eqqartuussiviup nalunaarutigissavaa.

Nammineq aningaasartuutiginagu eqqartuussisulersuussinissamut akuersissut utertinneqarsinnaavoq tunngavissatut nalunaarutigisat pigineqanngippata imaluunniit atorunnaarsimappata. Akuersissut utertinneqarpat nammineq aningaasartuutiginagu eqqartuussisulersuussinissaq sunniutaarutissaaq.

Qinnuteqaatitut immersugassaq una atorlugu nammineq aningaasartutiginagu eqqartuussisulersuussinissaq qinnuteqaatigineqarsinnaavoq. Ilanngussassat naleqquttut qinnuteqaateqartup ilanngutissavai, isertitat nalunaarsornerat kiisalu eqqartuussisulersuussinermi allagaatit ilanngullugit.